Gilbert Ralte leh a thuziak thehdarhtu lakah MPYCC leh MNYF ten Cyber Crime ah FIR thehlut

by Editor

Tualchhung News

ZORAM TODAY| 19th August, 2024 (Mon): Vawiin khan Mizo National Youth Front (MNYF) leh Mizoram Pradesh Youth Congress Committee (MPYCC) te chuan AMC Corporator boral ta John Zosangliana chungchangah dawtthu ngial ngan social media- facebook leh whatsaap hmanga ziak leh thehdarh ah Gilbert Ralte inti chu puhin Gilbert Ralte leh thu thehdarhtute man a, dan anga hma la turin Cyber Crime Police Station ah FIR leh Criminal Complain an thehlut.

Eva Lalduhawmi, General Secretary, Legal Dept., MNYF leh R. Lalhmingmawia, General Secretary, GAD, MPYCC te hminga FIR thehluh ah hian, MPYCC leh MNYF chuan, "Aizawl Municipal Corporation (AMC) a MNF Corporator John Zosangliana Ralte (L) dawt thu hrang hrang hmanga beihna, mi chi hrang hrangin an post kual a, he thu diklo ziaktu Gilbert Ralte in ti hi man chhuak tur leh, a post darh tute man a, dan anga an chunga hma la turin kan ngen a che," tiin Officer-In-Charge, Cyber Crime Police Satation, Aizawl ah FIR an thehlut a ni.

MNYF President leh Hachhek bialtu MLA Robert Romawia Royte chuan Zoram Today zawhna chhangin, "UD&PA dept hnuaiah Smart City atangin Chanmari West tan hetiang project siam hi a awmlo hrim hrim a, sum sanction phei chu a awm lo chiang hle a, Central leh Mizoram lama an hotute pawh ka be pawp a, hmalakna a awmloh thu an sawi," a ti a. "Mitthi engmah sawi thei tawh lo dawta puh a, dawt thu hmanga Inthlan lo awm tura mipui bum tumtute hi man chhuak vat turin thu neitute kan phut a ni," a ti.

Gilbert Ralte inti in AMC Ward VI-a Corporator John Zosangliana (L) chungchang a ziah, facebook leh whatsaap hmanga thehdarh chu a ngai ngaiin a hnuai ah hian dah a ni.

"CHANMARI WEST VENG, AIZAWL TEN VAIBELCHHE 15 AN CHAN !!! CHANMARI WEST MIPUITE TAN A VA UIHAWM EM EM VE!!

By Gilbert Ralte

Chanmari West veng hian Market Building an neilo a. Vaivakawn Bazar hi an pan khawm tlangpui thin a ni. Hei hi hria in Pu.K.Sapdanga chuan Inthlan laia ka ti ang tih alo sawi tawh chu, ZPM sawrkar ve leh an bawhzui zung zung nghal a.

A dept enkawl Smart City ( UD and PA ) atangin pawisa Vaibelchhe 15 chu Chanmari West Bazar sak nan a rawn sanction in,Chanmari west ah amah ngei lokal in,A rawn puang a ni. Chanmari west Veng mipui pawh an lawm hman hle Mahse!!????

ENGNGE LO THLENG TA LE !!!

Chanmari west area hi AMC ah leh Local council ah kha tih lai khan MNF rulling a ni a .He market sak na tur hmun hi Chanmari West vantlang ram a ni a.

He bazar ( motor parking / garrage,Warehouse) awm vek tur ruahmanna siam a ni a. He Bazar hmun tur hi LSC pass hi MNF AMC corporator khatihlaia ni mek Pu John a ( L) khan a pe chhuak duh tlat lo a ni.

Hetiang anih tak ah chuan,vawi tam tak AMC corporator hi dil leh ngen a nih hnuah pawh Market Chanmari west tan sak a duh miau siloh ah chuan, Smart City atanga pawisa hi lapse mai theih anih vangin,Hmun dangah Sawrkar chuan hrehtak chungin a divert ta a ni.

Chanmari west mipuite chuan bazar building ropui tak tur an chan ta a ni. Hei vang hian AMC ah Chanmari west mipuite hian vote lam ah change an thlen tir ve ngei a rinawm hle !!?? RAM leh HNAM HMASAWNNAN PARTY rilru dah that fo a ngai thin. MNF party hian mahni party hamthatna chiah an zawn thin hi bansan se a tha hle mai." tih a ni.